ثامن السبع العجايب

[د/ أبوتركي]

اسمعي والكل منا له هواه وله ميوله
لاتمسين بكلامك شعرة بروس القرايب

ان حكيتي ماوفيتي وان تحديتي عجوله
تحسبين ان كل فعل تفعله يمناك صايب

تحسبين انك خذيتي بالحشاء صولة وجوله
تحسبين اني ذكرتك مع نسانيس الهبايب

والله انك لو ذبحتي خافقي لالقاك حوله
عاشقه تشقى بفلب من طريق العشق هايب

كم رضيت اسكت عليك من القهر وانتي زعوله
خايف اضحك واستفزك واهجرك واعيش ذايب

ادعيت انك خجوله وادري ان منتي خجوله
وادري انك تخجلين الشمس من فوق السحايب

مايحببني بقلبك يالهنوف الا فضوله
وماينسيني غرامك غير تكرار المصايب

عاشقه جيتي ورحتي يالحبيبه يالعذوله
مابنيتي لي طموح ولاتركتيها خرايب

تستبيحين القلوب وتستحقين البطوله
واستحق بعدك تايب واموت تايب

ياكثر ماشال قلبي شيء اكبر من حموله
واعفيتي عن غلاه ولابخلك بالوهايب

كنه ارحم من همال المزن للزهر بذبوله
وانتي اقسى من سموم القيض وكفوف اللهايب

وانتي ادرى في غلاك بداخلي شاللي يزوله
وادخلي دخله على الله واحفظي ذيك السبايب

ماخبرت اللحظه اللي حللت قربك تحوله
ولاهقيت اني بشدد للجفا قلب وركايب

ماهقيت انك تحسبين الزلل وانتي جفوله
وماهقيتك تكرهيني كثر حبك للطلايب

كن قلبي في وصالك وابل لحظة نزوله
وفي فراقك مثل دمعه تنحدر من عين شايب

كنت ابي وقفه حبيبه تنهض القلب بخموله
طافح بالعشق وانتي عايبه والحظ عايب

كنت عصن كل كف غير كفك مايطوله
كنت درب ودمعتين وقلب وجروح عطايب

كنت ابيع العمر كله وارخصه عرضه وطوله
للعيون اللي هدبها ثامن السبع العجايب

بس ابرضيلك غرورك واكسر القلب بذهوله
وقتها ماكنت افكر صايب او كنت خايب

والرجل لو ماعلى بالشهامه والرجوله
صدقيني صعب يقدر يملك قلوب الحبايب

صدقيني مايوالف خافق البنت بسهوله
بالهوى يابنت حواء غير طلاب النشايب

والسهر والعشق الاول والهوى واللي ينوله
شيء اقسى من همومك وألعنه حاظر وغايب

والهموم اللي دعتني من بعد سن الطفوله
كلها من تحت رأس العشق ملعون الصلايب


منقول للشاعر الكبير / حامد زيد

مع أجمل تحياتي للجميع :) :) :)

د/ أبـــو تـــركي

[الاميره دانيه]

السلام عليكم ورحمة الله وبركاته
بارك الله فيك عبى المنقول
لا حرمت اجرها
الاميره

[د/ أبوتركي]

ألف شكر لج يا أميرتنا على الرد الجميل وللأمام إن شاء الله

تحياتي،،،

الدكتور

[نبض الحب]

الاخ العزيز ابوتركي



وفائك لعهد الشعر..


يثلج صدر النور من ثغر ايادي صفقات الجمهور..

فهنيئا لنا بك ..

وهنيئا لك بهذا الوفاء يحق لقلمك العذب..

ان يصافح شغف النضر والسمع..


سلمت يمينك اخي ..


في انتضار الجديد والمميز

[د/ أبوتركي]

الفخر لي طول الله بعمرك يا نبض الحب دام أني عرفتك فعلا أنا اللي أهني نفسي

لأن معرفتكم تسوى الدنيا ومافيها , أشكرك من القلب للقلب على هذا الرد الجميل

وللأمام إن شاء الله

تحياتي لـ نبض الحب :) :) :)

الدكتـــــــور

[القلب الحزين]

صح لسانك



أبدعت وتمكنت


يعطيك العافيه




.

[د/ أبوتركي]

صح بدنك يا القلب الحزين وهذي شهاده أعتز و أفتخر فيها وللأمام إن شاء الله

تحياتي

الدكتـــــور